不知有無人用過個叫hkflash的留言畫板﹐我用過﹐大概六年前。剛剛有個朋友提起這個畫板﹐情不自禁我也從頭翻看一次。的確很多回憶。並不是說在留言板上發生過甚麼事﹐只是﹐不知怎麼﹐我打這幾行字的時候﹐有點眼濕濕﹐或者一切盡藏回憶二字中。想起當時的自己﹐想起當時的別人﹐想起當時的心情。我想起以前玩IRC﹐很喜歡自說自話﹐就算無人回應﹐自己跟自己講都是開心的﹐我最愛就是講電視﹐不經大腦不停說話感覺好爽快。雖說無人回應仍自顧自話﹐但久而久之就吸引一班人圍在一堆﹐大家多數時候就是一齊講廢話﹐正是群居終日﹐言不及義﹐然亦有時講心底話﹐講心事。然後在hkflash﹐我還是一貫風格﹐自己講自己笑﹐也不理有無人看﹐但好神奇﹐經過一排﹐有幾個陌生人來留言同我傾計﹐其中一個後來更輾轉成為朋友﹐愈想愈神奇﹐hkflash﹐朋友﹐網上交友已經神奇﹐而且在留言板上﹖還算不上是個討論區。雖然﹐說的這個朋友我從來未見過﹐嚴格來講﹐是個網友﹐不過同時﹐也是筆友﹐又是電話友﹐再說實在點﹐跟她是個心靈上的朋友﹐不﹐不是神交﹐只是﹐我知道她在我身邊﹐也知道她知道我在她身邊。不過剛剛打電話給她﹐沒人接聽﹐本人有點不爽。 Keiko﹐我好掛住妳﹐我成日都諗起果時打電話搵妳陪我睏覺﹐成日都諗起﹐真嘅﹐而且成日同唔同人提起﹐我有過咁既經歷﹐畀我好大安全感﹐睏覺嘅安全感﹐我好感激妳。 蚊蚊﹐無錯﹐妳一定知我講緊妳﹐真係好奇怪係咪﹐我好想知道當初咩係驅使妳留言﹐可能呢啲叫天意﹐令我哋認識﹐我話畀妳聽﹐呢啲就叫對嘅timing﹐如果妳而家先認識我﹐一切會唔同﹐因為而家嘅我都唔同當時嘅我。唔﹐其實諗真啲可能只係有少少唔同。無乜唔同﹐或者。 若然。唔﹐呢個真係陌生人﹐完全唔知係乜水﹐但都斷斷續續相交咗近一年﹐妳2001年時話dumped by a fucking guy﹐我默默希望妳而家已經完全忘記﹐而且生活愉快﹗ 玫子。係唯一係個留言板話我寫錯字嘅人﹐向來只有我話人寫錯字﹐果次幾乎畀佢挑戰到﹐換著而家嘅我﹐一定唔會show妳﹗但我當時話﹐妳都算同我差唔多煩喎﹐妳答﹐大家都唔衰得啦﹗﹗我果一刻真係覺得遇到留言板上既知己﹗ 好想好似以往一樣﹐繼續安慰大家﹐繼續開解大家﹐繼續陪伴大家。但而家已經無喇﹐係無咁嘅機會﹐定無咁嘅心﹐定無咁既咩嘢﹐唔知道。或者我哋已經唔再熟絡喇﹐或者你哋現在生活已經無憂﹐或者你哋唔需要我喇﹐或者你哋身邊已經有太多其他人擔當呢個角色﹐原因可以有好多﹐事實只係有一個﹐事實就係﹐無喇﹐無咗好耐喇。 講到呢度﹐Keiko﹐再多謝妳﹐令我再沐浴於美好嘅回憶中﹐我久不久都有返留言板睇﹐不過見無人留言就算了﹐未曾想過翻睇舊留言。妳一定要留電話畀我﹗或者妳打畀我﹐我電話無變。再多謝妳。 係﹐蚊蚊﹐都多謝妳﹐我形住我最後唔係多謝妳﹐妳會追到我瘦。 九龍皇帝曾灶財已經死咗。但係我未死。 最後我想話同留言板嘅各位講聲﹐我返唻喇。 不過我知道無幾多人聽到。